واحد فلول وصلّحه كل نكسه فى البلد الفلول حتى الزلازل والبراكين وجوع الشعب الغلبان

واحد فلول وصلّحه

كل نكسه فى البلد الفلول حتى الزلازل والبراكين وجوع الشعب الغلبان

أعتقد أن من أخرج مصطلحات الفلول والثورة المضادة يستحق جائزة الدولة التقديرية في "الإبداع اللفظي" و"المصطلحات القائمة" على "رصد الأمر الواقع" لدى "الشعب القابع" في أرض النيل.
كلمنا عربي يا أستاذ.. "ده كلام كبير يصعب على أمثالنا فهمه"، على رأي سعيد صالح في مدرسة المشاغبين. طيب هكلم حضراتكم بالبلدي وبلاش العربية الفصحى لأن الجمهور عاوز كده.
من أول ما مبارك تنحى في 11 فبراير، وأي مصيبة تحصل في مصر يطلع واحد مثقف من بتوع روايات الجيب وأفلام السينما الهابطة أو واحد من بتوع حرية حرية من غير سقف، يقول لك: فلول.. ثورة مضادة.. أعداء الثورة. وإذا دخلت حضرتك على الانترنت وشفت موضوع خاص بالثوار ودعواتهم المليونية "المهلبية" وشفت تعليقات معارضة لما يحدث يطلع لحضرتك تعليق أو اتنين يتهم من يعارضون أفعال الثوار في التعليقات بأنهم "جنود" اللجنة الاليكترونية التابعة لجمال مبارك والحزب الوطني الديمقراطي المنحل.
طيب لما انتم خايفين أوي كده من الفلول وخايفين من تأثيرهم الرهيب على الشعب الغلبان والناس الزهقانة الطهقانة، ما كنتم تنزلوا الشارع تشوفوا أوجاع البشر وهمومهم بدل ميدان التحرير اللي نزل عليه مؤخرا واحد بيقول إنه المهدي المنتظر، ووصفته المرشحة الرئاسية المحتملة بثينة كامل في تصريح سابق بأنه زي جبل عرفات ولازم نحج إليه.
المشكلة كمان إن الثوار والائتلافات والحركات السياسية والأحزاب الكرتونية لا تريد أي وجود للنظام الفردي في الانتخابات البرلمانية المقبلة، برده علشان خايفين من الفلول.. طيب يا أخوانا يا بتوع الديمقراطية والحرية والنزاهة.. مواطن عاوز يرشح نفسه مستقل، لا هو فلول ولا إخوان ولا ثورجي، تحرموه ليه من حقه، ولا هي الديمقراطية قلبت معاكم "ديموكتاتورية"؟؟.
وبعدين، يعني إيه كلمة "فلول"؟؟ هو كل واحد انتمى يوما ما للحزب الوطني خلاص نضرب عليه رصاص زي خيل الحكومة، ونحرمه من حقه كمواطن؟، عاوزين تطبقوا قانون الغدر، طبقوه، ولكن يا ريت تطبقوه برده على اللي غدروا بالبلد وباعوها مقابل حفنة دولارات وجمعيات وسفريات، واللي قالوا إن الثورة مكنش ممكن تنجح إلا ب"تحييد" الشرطة، مش ده غدر برده ولا إيه؟.
الانتخابات جايه جايه.. خايف لما النتيجة تطلع يخرج حبايبنا يقولوا "آه يا ولاد الفلول"